અભિનેતા અને બિગ બોસ-13ના વિજેતા સિદ્ધાર્થ શુક્લાનુ અવસાન થયું છે. જે બાબતે મુંબઈની કૂપર હોસ્પિટલે સિદ્ધાર્થના મૃત્યુની પૃષ્ટિ કરી છે. આમ 40 વર્ષીય સિદ્ધાર્થ શુક્લાનું હાર્ટએટેકના કારણે અવસાન થયું છે. તેમના અચાનક અવસાનના કારણે સમગ્ર બોલિવુડ અને ટીવી ઈન્ડસ્ટ્રી શોકમાં છે. તમામ અભિનેતા અને અભિનેત્રીઓ દ્વારા સિદ્ધાર્થ શુક્લાના અવસાનને લઈ શ્રદ્ધાંજલિ આપવામાં આવી રહી છે. 12 ડિસેમ્બર,1980ના રોજ મુંબઈમાં જન્મેલા સિદ્ધાર્થે એક મોડલ તરીકે પોતાની કરિયરની શરૂઆત કરી હતી. ઇસ.2004માં ટીવી દ્વારા એક્ટિંગમાં ડેબ્યુ કર્યું હતું. ઇસ.2008માં તેઓ બાબુલ કા આંગન છૂટેના નામની ટીવી સીરિયલમાં જોવા મળ્યા હતા. પરંતુ બાલિકા વધૂ સીરિયલ દ્વારા તેમને સાચી ઓળખ અને ખ્યાતિ મળી હતી. ટીવી ઈન્ડસ્ટ્રીઝમાં સફળતા બાદ તેમણે બોલિવુડનો રસ્તો પકડ્યો હતો. તેઓ 2014માં આવેલી હમ્પ્ટી શર્મા કી દુલ્હનિયા નામની ફિલ્મમાં જોવા મળ્યા હતા. આ વર્ષે તેમની બ્રોકન બટ બ્યુટીફુલ નામની વેબ સીરિઝ આવી હતી જે લોકોને ખૂબ પસંદ આવી હતી.
