અમેરિકામાં ફેડરલ રિઝર્વ વ્યાજનો દર વધારશે એ નિશ્ચિત થયા પછી શેરબજારમાં વેચવાલી જોવા મળી છે તેમાં વિશ્વના ધનિકોની સંપત્તિમા ઘટાડો જોવા મળ્યો છે.જેમાં વિશ્વના ટોચના પાંચ ટેકનોલોજી ક્ષેત્રે કાર્યરત ધનકુબેરોની સંપત્તિમાં ગત સપ્તાહમાં 67 અબજ ડોલરનો ઘટાડો થયો હોવાનું જાણવા મળે છે.અમેરિકન શેરબજારમાં ટેકનોલોજી કંપનીઓના સ્ટોક એક્સચેન્જ નાસ્ડાકનો મુખ્ય નાસ્ડાક 100 ઇન્ડેક્સ નવેમ્બર મહિનામાં ઓલટાઈમ હાઈ 16,764 થયા બાદ સતત ઘટી રહ્યો છે જે 14,438 બંધ રહ્યો હતો ત્યારે તેમાં 13.9 ટકાનો ઘટાડો દર્શાવે છે. આ ઇન્ડેક્સની 100 કંપનીઓમાંથી 83 કંપનીઓના શેરના ભાવ જાન્યુઆરી પછી ઘટેલા જોવા મળી રહ્યા છે.વિશ્વમાં સૌથી ધનિક ઈલોન મસ્કની સંપત્તિ ગત એક સપ્તાહમાં 25 અબજ ડોલર ઘટી ગઈ છે.પરંતુ હજુ તેઓએ સૌથી ધનિક વ્યક્તિ તરીકે પોતાનું સ્થાન જાળવી રાખ્યું છે.નવેમ્બર મહિનામાં જયારે શેરબજારો તેજીમાં હતી ત્યારે બ્લુમબર્ગના અહેવાલ અનુસાર મકસની સંપત્તિ 243 અબજ ડોલર હતી એ પછી અત્યારે તેમની સંપત્તિ 168 અબજ ડોલર આંકવામાં આવી રહી છે એટલે કે બે મહિનામાં તેમની સંપત્તિમાં 63 અબજ ડોલરનો ઘટાડો જોવા મળ્યો છે.આ સિવાય એમેઝોનના ફાઉન્ડર જેફ બેઝોસની સંપત્તિ 20 અબજ ડોલર ઘટી ગઈ છે,ફેસબુકના માર્ક ઝુકરબર્ગની સંપત્તિ 10.4 અબજ ડોલર,ગુગલના લેરી પેજની 7.6 અબજ ડોલર,બીલ ગેટ્સની સંપત્તિમાં 4.3 અબજ ડોલરનો ઘટાડો જોવા મળ્યો છે.
